खेबाङमा आजदेखि खेलकुद महोत्सव
ताप्लेजुङ, कात्तिक १६ गते । ताप्लेजुङको सिरिजङ्गा गाउँपालिका–५ खेबाङमा आजदेखि खेलकुद महोत्सव सुरु हुँदै छ । खेबाङ स्पोर्टिङ क्लबको आयोजनामा कात्तिक २१ गतेसम्म छ दिन सञ्चालन हुने महोत्सवमा फुटबल, भलिबल र हाफ म्याराथनलगायत प्रतियोगिता आयोजना हुने भएका छन् ।
क्लबका अध्यक्ष बिनम मावोका अनुसार विगतका वर्षमा खेबाङ गोल्डकप सञ्चालन हुँदै आएकोमा यस वर्षदेखि विभिन्न खेल विधा समेटेर महोत्सव आयोजना गर्न लागिएको हो । महोत्सवमा खुला पुरुष फुटबल, वडास्तरीय पुरुष तथा महिला भलिबल र हाफ म्याराथनसँगै सांस्कृतिक कार्यक्रमसमेत सञ्चालन हुनेछन् ।
‘सिरिजङ्गाको गौरव कञ्चनजङ्घा, स्वास्थ्यका लागि खेलकुद, राष्ट्रका लागि खेलकुद’ भन्ने नारासहित आयोजना हुने महोत्सवमा खुला पुरुष फुटबलतर्फ आठ टोली सहभागी हुनेछन् । फुटबलको पहिलो खेलमा मंगलबार नेना कम्पनी प्रालि खेबाङ र सिदिङ्वाको आङ्खोप युवा समाजबीच प्रतिस्पर्धा हुनेछ । दोस्रो खेलमा कञ्चनजङ्घा स्पोर्टिङ क्लब याम्फुदिन र पेदाङ स्पोर्टिङ क्लबबीच खेल हुनेछ ।
त्यस्तै, कात्तिक १८ गते तेल्लोक स्पोर्टिङ क्लब र सुरुम्खिमको लालीगुराँस स्पोर्टिङ क्लब तथा कात्तिक १९ गते आयोजक खेबाङ स्पोर्टिङ क्लब र झापाको आरएसएस फुटबल क्लबबीच प्रतिस्पर्धा हुनेछ । त्यसपछि सेमिफाइनलका खेल सञ्चालन हुने आयोजकले जनाएको छ ।
महोत्सवको उद्घाटनकै दिन आज पुरुष भलिबल प्रतियोगितासमेत सुरु हुनेछ । पहिलो खेल बिहान १० बजे आङ्खोप र आम्बेगुदिनबीच हुनेछ । त्यसपछि तेल्लोक र खेबाङ, खेबाङ र मामाङ्खे तथा मेहेले र पेदाङबीच खेल हुने तालिका छ । प्रतियोगितामा सुरुम्खिम र थुम्बेदिनका टोलीले पनि सहभागिता जनाउनेछन् ।
खुला पुरुष फुटबलको विजेताले एक लाख ५५ हजार ५८३ र उपविजेताले एक लाख पाँच हजार ५८३ रुपियाँ पुरस्कार पाउनेछन् । पुरुष भलिबलको विजेता र उपविजेताले क्रमशः ६० हजार र ४० हजार तथा महिला भलिबलको विजेता र उपविजेताले ३० हजार र २० हजार रुपियाँ प्राप्त गर्नेछन् ।
हाफ म्याराथनमा प्रथम हुनेले ३३ हजार ३८३, द्वितीयले २२ हजार ३८३ र तृतीयले १३ हजार ३८३ रुपियाँ प्राप्त गर्नेछन् । प्रतियोगितामा दशौँ स्थानसम्मका खेलाडीलाई नगद पुरस्कार प्रदान गरिने आयोजकले जनाएको छ ।
खेबाङलाई पर्यटनसँग जोड्दै स्थानीय क्षेत्रको प्रचारप्रसार र प्रवर्धन गर्ने उद्देश्यले महोत्सव आयोजना गरिएको अध्यक्ष मावोले बताउनुभयो । महोत्सव सम्पन्न गर्न करिब २५ लाख रुपियाँ खर्च हुने अनुमान गरिएको छ । स्थानीय तह, जलविद्युत् आयोजना तथा देश–विदेशमा रहेका खेलप्रेमीबाट प्राप्त सहयोगका आधारमा महोत्सव सञ्चालन गरिने क्लबले जनाएको छ ।
एन्फा अध्यक्ष नेम्वाङ र महासचिव राईलाई धरौटीमा रिहा गर्न अदालतको आदेश
काठमाण्डाै – जिल्ला अदालत ललितपुरले अखिल नेपाल फुटबल सङ्घ (एन्फा) का अध्यक्ष पङ्कजविक्रम नेम्वाङ र महासचिव किरण राईलाई धरौटीमा छाड्न आदेश दिएको छ
तेश्रो फङ्फङदेन झरना पर्यटन तथा सांस्कृतिक मेला मंसिर २ गतेदेखि
ताप्लेजुङ – तेश्रो फङ्फङदेन झरना पर्यटन तथा सांस्कृतिक मेला आगामी मंसिर २ गतेदेखि हुने भएको छ । फङ्फङदेन झरना पर्यटन विकास समितिको आयोजना
फुलबारीमा चौथो विजया दशमी खेलकुद तथा सांस्कृतिक कार्यक्रम हुने
ताप्लेजुङ- ताप्लेजुङको आठराई त्रिवेणी गाउँपालिका –२ फुलबारीमा चौथो विजया दशमी खेलकुद प्रतियोगिता तथा सांस्कृतिक कार्यक्रम हुने भएको छ ।
प्रतिकृया दिनुहोस