ताप्लेजुङमा चार दिनमै ९५ क्विन्टल चिनी बिक्री

खाद्य व्यवस्था तथा व्यापार कम्पनी लिमिटेड ताप्लेजुङमा चामल तथा चिनी खरिद गर्न आएका उपभोक्ताहरु । तस्बिर : कृष्ण फुरुम्वो लिम्बू

ताप्लेजुङ - ताप्लेजुङमा चार दिनको अवधिमा खाद्य व्यवस्था तथा व्यापार कम्पनी लिमिटेडले ९५ क्विन्टल चिनी बिक्री गरेको छ । स्थापना भएको ४८ वर्षपछि ताप्लेजुङमा बुधबारबाट चिनी बिक्री सुरु गरेको कम्पनीले चार दिनकै अवधिमा ९५ क्विन्टल चिनी बिक्री गरेको हो ।

कम्पनी ताप्लेजुङका शाखा प्रमुख प्रकाश तिम्सिनाका अनुसार बुधबार पहिलो दिन २१ क्विन्टल, बिहीबार दोश्रो दिन साढे १९ क्विन्टल, शुक्रबार तेश्रो दिन २५ क्विन्टल र सोमबार चोथो दिन साढे २८ क्विन्टल चिनी उपभोक्ताले खरिद गरेका छन् । चार दिनको अवधिमा १० लाख बढीको चिनी बिक्री भएको कम्पनीले जनाएको छ ।

ताप्लेजुङमा पहिलो चरणमा १८० क्विन्टल चिनी आएको थियो । जसमध्ये ९५ क्विन्टल बढी चिनी बिक्री भएको छ भने हाल ८० क्विन्टल मात्र चिनी कार्यालयसँग मौज्दात रहेको छ । बजारमा चिनी प्रति किलोग्राम १४० रुपियाँसम्म पर्ने र खाद्यमा प्रतिकिलोग्राम ११० रुपियाँमै उपभोक्ताले खरिद गर्न पाउँदा चाप बढी भएको कार्यालयले जनाएको छ । पहिलो र दोश्रो दिन प्रतिव्यक्ति ६ किलोग्राम मात्र चिनी प्रदान गरिएकाले उपभोक्ताको भीड लागेको थियो । भीडलाई मध्यनजर गर्दै हाल प्रतिव्यक्ति २५ किलोग्रामसम्म चिनी प्रदान गर्न सुरु गरिएकाले सेवाग्राहीको चाप केही मात्रामा नियन्त्रण भएको कार्यालय प्रमुख तिम्सिनाको भनाइ छ ।

कार्यालयका अनुसार चामलको माग समेत उत्तिकै मात्रामा वृद्धि भइरहेको छ । सोमबार एकैदिन ५० क्विन्टल चामल बिक्री भएको थियो । कार्यालयमार्फत २५ किलोग्रामको स्टिम जिरा मसिनो चामल प्रतिबोरा दुई हजार १७५ र सोना मनसुली चामल एक हजार ४२५ रुपियाँमा बिक्री भइरहेको शाखा प्रमुख तिम्सिनाले जानकारी दिनुभयो ।

चालु आर्थिक वर्षको हालसम्ममा करिब ४१ लाख ८१ हजार ६०० रुपियाँको ५२३ क्विन्टल चामल बिक्री भएको कार्यालय जनाएको छ । सेवाग्राहीले दैनिक उपभोग्य सामाग्रीहरू खानेतेल, दाल लगायतका सामाग्रीहरू समेत खरिदका लागि माग गरेका छन् । सोही अनुसार कार्यालयले थप प्रक्रिया अघि बढाएको र दशैँ अघि देखि नै थप सामाग्री ताप्लेजुङ ल्याउने पहल भइरहेको प्रमुख तिम्सिनाले बताउनुभयो ।

कार्यालयले गत आवमा एक करोड ६ लाख रुपियाँ बढीको चामल बिक्री गरेको थियो ।